නිවාඩු පැතුම.....

අද අගෝස්තු 3 , අද ඉදල මාසයක් ඉස්කෝල නිවාඩුයි. ආයෙ පටන් ගන්නෙ සැප්තැම්බර් 3. නිවාඩුව මෙච්චර දිග වුනේ අගෝස්තු මාසෙ විභාග මාසෙ හින්ද. මම කියන්න ඕන නෑනෙ, කවුරුත් දන්නව අගොස්තුවල අ.පො.ස. උසස් පෙළ හා 5 ශ්‍රේණිය ශිෂ්‍යත්ව විභාග පැවැත්වෙන වග.
ඉතින් අද සිසුන් ගුරුවරුන්ට යන්නං සාර්, යන්නං මිස් කියල වැදල ඉස්කෝලෙට ටටා කියල ගෙවල්වලට ගියා අපිත් ඉස්කෝලෙට එහෙනං මාසෙකින් මීට් වෙමු කියල ගෙවල්වල ආව.
ඔන්න ඔතනදි කියන්න ඕන අපේ කාලේ නම් අපි අපේ ගුරුවරු සියළු දෙනාට පාසල අවසන් දවසෙ දණ ගහල වැඳල තමයි ඉස්කෝලෙන් එන්නෙ ඒත් දැන් ටික ටික ඒව අඩුවෙලා. අපි ගොඩක් හොදයි, එහෙම නැත්නම් හොදට වැඩකරනව කියල හිතන් ඉන්න ළමයි තමයි මුලින්ම කාටත් හොරා අද ඉස්කෝලෙන් පැන්නෙ. මට හිතෙන්නෙ නූතන සිසු පරපුර දැනුමට මුල්තැන දෙනව ඕනවට වැඩී කියල. ඒත් නූතන ගුරු පරපුරත් මේ ප්‍රවනතාවට අඩු වැඩි වශයෙන් වගකියන්න ඕන.
(හිතනෙපා මම සාම්ප්‍රධායකාරයෙක් කියල. මම එහෙම කොහොම කෙනෙක් උනත් මගේ විශ්වාසය සමහර පාසල් සම්ප්‍රධායන් හැමදාම තියෙන්න ඕන කියන එක. ඒ දේවල් වලින් තමයි ගුරු සිසු බැදීම ශක්තිමත් වෙන්නෙ, නැද්ද මම කියන්නෙ. සිසුන්ගෙන් වැදුම් ලබන හෘදසාක්ෂියක් හිමි ගුරුවරයෙක් කවදාවත් වැරදි දෙයක් සිසුන්ට උගන්වයිද? කවදාවත් සිසුන් වෙනුවෙන් ඇති තම යුතුකම් පැහැරහරීද? )

තව දෙයක් කියන්න ඕන. පාසල් නිවාඩු දෙන දවස තමයි කොල්ලො ආතල් (කොල්ලන්ගෙ වචන) ගන්න දවස. ඒ කියන්නෙ නිල් ගහ ගැනීම්, ගුටි ගහ ගැනීම්, ලයින් දැමීම් වගේ මෝඩකම ප්‍රදර්ශනය කරන ගොඩක් වැරදි වැඩ සඳහා හොදම දවස විදියට කොල්ලො ‍තෝරගන්නෙ නිවාඩු දෙන දවස. හැබැයි මේ සැරේ අපේ ඉස්කෝලෙ නම් ඒව තිබුනෙම නෑ. විනය ආරක්ශා කරගන්න අපේ ගුරු මහත්වරුන් ගොඩක් මහන්සියෙන් එකමුතුව ක්‍රියා කිරීමතමයි හේතුව. අනිත් ඉස්කෝල ගැන මම දන්නෙ නෑ.

තව එකම එක දෙයක් කියන්න ඕන...... මේ මාසෙ 6 පටන් ගන්න අ.පො.ස. උසස් පෙළ විභාගයට පෙනී සිටින දූදරුවන්ට අපි සුභ පතනව ඒ වගේම ප්‍රර්තනා කරනව හොදට විභාගෙට මූණ දෙන්න කියලනම් නෙවෙයි, විභාගෙන් පස්සෙ ප්‍රථිපල නිකුත් කරද්දි Z-Score අවුලක් නොවේවා කියල. 

නියම නිවාඩුවක් වේවා.....

කෙල්ලන් සමග වලියක්......

කොල්ලෙකුට අම්බානට නෙලන කෙල්ලෙක්

ඊයෙ වෙච්ච සිද්ධියක් නිසා අමුතු කල්පනාවක් මට පහලවුනා.
සිද්ධිය මේකයි,
8 වසරේ කොල්ලෙක්ට කෙල්ලෙක් ටොක්කක් ඇන්න. ඊට පස්සෙ කොල්ලො 5 දෙනෙක් විතර අර කෙල්ල වටකරගෙන ඒකිට ටොකු ඇන්න. මම දෙගොල්ලන්ටම බැන්න.

කොල්ලන් හා කෙල්ලන් අතර බැදීම.

1-5 වසර - කවුරුත් එක වගේ වෙනසක් නෑ. එකට සෙල්ලම් කරයි. විනෝදයෙන් සිටී.
6-8 වසර - කෙල්ලන් හා කොල්ලන් අතර සෑම විටම වලි ඇවිලේ. විටෙක කෙල්ලන් කොල්ලන්ට ගුටියක් ඇන දුවයි ඉන්පසු කොල්ලන් පස්සෙන් පන්නමින් කෙල්ලන්ට ගුටි බෙදයි. කෙල්ලන් යටිගිරියෙන් බෙරිහන්දෙයි.
9 වසර - කොල්ලන්ට කෙල්ලන් අමුතු සතුන් සේ පෙනේ.එම නිසා වැඩි තැකීමක් නොකරයි.
10-11 වසර - කොල්ලන්ට කෙල්ලන් ගේ ලස්සන පෙනේ, එම නිසා ඇතැමුන් අතරේ සම්බන්දතා ඇතිවේ. සබඳතා නිසා කොල්ලන් කොල්ලන් අතරේ වලි ඇවිලේ. කෙල්ලෙක් නිසා කොල්ලන් දෙදෙනෙකු ගැ‍ටුම් ඇතිකර ගනී. එවිට එම කොල්ලන්ගේ යාළුවන්ද දෙපිළට බෙදී අමනාපකම වලියක් බවට පරිවර්ථනය කරගනී.
12-13 වසර - කෙල්ලන් කොල්ලන් එක බත්පත බෙදාගෙන කා සහෝදරයන් සේ හැසිරේ. ඇතැමුන් සබඳතා වර්ධනය කර ගනී. ලිංගිකත්ව හැගීම් ඇතිවේ. සහෝදර කෙල්ලන්ගේ යහළු කෙල්ලන් ගැන සිතයි. ඔවුන් ගැන කෙල්ලන්ගෙන් විමසයි.

ඔන්න ඔහොමයි වෙන්නෙ......
ඔබතුමන්ල තුමීන්ල මොකද හිතන්නෙ......

ගුටියක් කමු....

දඩුවම හා අධ්‍යාපනය

එක්තරා පාසලක ගුරුවරුන් දෙපලක් සිටී. එක් අයෙක් ළමයින්ට උපරිම කරුණාව දක්වයි. අනෙක් කෙනා පොඩි වරදටත් ඒ වරදේ ස්වභාවය අනුව දැනෙන්න දඩුවම් කරයි. නමුත් මොවුන් දෙදනාම සිසුන්ගේ පූර්ණ භක්තියට ආදරයට ගෞරවයට ලක්වේ.
මේක බලන් හිටපු වෙනත් ගුරුභවලතෙක් සමහර ළමයින්ට ආදරයත් සමහරුන්ට උපරිම දඩුවමත් ලබාදීමට පටන් ගත්තේය. ඔහොම ටික දවසක් කරන් යනවිට හදිස්සියේම පාසලට පොලීසියෙන් පැමිණියේය. කාරණාව මෙයයි, අර ගුරුවරිය එක හැන්දෙන් නොබෙදා ඒඒ සිසුවාට ඒ ඒ හැන්දෙන් බෙදීම නිසා සිසුන් කිහිප දෙනෙක් ඔවුන්ට කරන වෙනස්කම් ගැන නිවසට පැමිණිලි කර ඇත. ඉන්පසු දෙමව්පියන් ඉතිරිහරිය බලාගෙන ඇත.

මේ සිදුවීම අප පාසලට ආරංචි වුනේ ඊට දිනකට පසුවයි. ඔන්න එදා දවසේ මාතෘකාව බවට එම සිදුවීම පත්විය. එම කතාබහේ සාරාංශයක්  මා පහතින් දක්වමි.

දඩුවම අනුමත කරන පිරිස,
1. වරද දු‍ටු තැන දඩුවම් කලාට කම් නැත නමුත් දඩුවම ඒ ඒ පුද්ගලයාට අනුව වෙනස් නොවිය යුතුය.(පුදගලානුබද්ද නොවීම)
2. දඩුවම් කලාට කමක් නැත. නමුත් වරදේ ස්වභාවය අනුව දඩුවමේ ස්වභාවය තීරණය විය යුතුය.
3. දඩුවම් කල සැම විටම සංවේදනයක් සිසුවාට ලබාදිය යුතුය.
4. ශරිරික දඩුවම සෑම විටමු සුදුසුය, මානසික දඩුවම එතරම් සුදුසු නොවේ.

දඩුවම අනුමත නොකරන පිරිස,
1. දඩුවම් කිරීම නිශ්ඵලදායකය.
2. දැන් ඉන්න ළමයින්ට ගැහුවට බැන්නට දැනෙන්නේ නෑ. එයාලට ඕන දැනුම විතරයි ගුණධර්ම නොවෙයි.
3. දඩුවමක් දීම කළ යුතුමනම් මානසික දඩුවමක්  දීම සුදුසුය.
4. සිසුන්ට නිවැරදිව අවශ්‍ය දැනුම ලබාදීම ප්‍රමාණවත්ය, දඩුවම අධ්‍යාපනයට අදාල නොවේ.

නීතිය,
සිසුවකුට  දඩුවම් කිරීම කළ යුත්තේ අඩියක් දිගැති කෝ‍ටුවක් අතට ගෙන වැළමිට සිරුරට තදකර සිසුවාගේ උරයට තුන්වරක් සෙමෙන් තට්‍ටු කිරීමයි. මෙය ප්‍රංශ නීතියකි.


දෙමාපිය නීතිය,
හහ් එහෙම කොහෙද, අපේ ළමයට ගහන්න එයා කවුද.... මෙසේ කියා එක්කෝ පොලීසි යයි. නැත්නම් ගුරුවරයා පාරේයන වෙලාවක් බලා තම වාහනය ඔහුට හරස්කර හොදට නෙලා අතපය කඩා දමයි.

මට හිතෙන විදිය,
ළමයින් යනු ළමයින්ය, ළමයා ඒ වෙලාවට හිතෙනදේ කරයි. දඩුවම හෝ වෙනත් දෙයක් ගැන සිතනුයේ ඉන් පසුවය, ඇතැමුන් සිතන්නේම නැත. ගුරුවරුන් දඩුවමක් ලබා දුන්නාට කම් නැත. නමුත් අනිවාර්යයෙන්ම සංවේදනයක් ලබාදිය යුතුය. දඩුවමද නිර්මාණශීලී විය යුතුය. එවිට සිසුවාට එම දඩුවම මතකයේ ‍රැදෙනවා සේම වරද වරදක් බව වටහා ගනී. සෑම සිසුවාටම එක හැන්දෙන් බෙදිය යුතුය.
ගුරුවරයා යනු ගුරුවරයා බව සිසුවාද තේරුම් ගත යුතුය. ඔහු දඩුවමක් ලබා දුනහොත් ඒ සිසුවා යහමගට ගැනීමට බව අමතක නොකල යුතුය.

ඔබට හිතෙන  විදිය,

Images From Here

ඉවරයි....

ගුරුවරයා යනු ණයකාරයෙක්ද?

මනුස්සයෙක් අහන්න අහන්න අකමැතිම වචන වලින් එකක් තමයි තමා ණයකාරයෙක් කියන වචනය. ලෝකෙට ණයකාරයෙක් වෙලා ඉදල මොකටද කියල ඉස්සර අපේ වැඩිහිටියො කියනව මම අහල තියෙනව.
මේලඟදි දවසක අපේ ගුරු සෙට් එක ස්ටාෆ් එකට වෙලා වට මේස සාකච්ඡාවක හිටිය. ඔය වෙලාවෙ තමයි මේ ණය මාතෘකාව එලියට පැන්නෙ.
එක්කෙනෙකුට කියවුනා මගෙ ණය වාරිකෙ අදවත් දමන්න ඕනෙ කියල, ඔන්න ඔය වෙලාවෙදි අනිත් අය කියවන්න ගත්ත තමතමන්ගෙ ණය ගැන. සමහරුන්ගෙ පඩිය 30000 යි ඒත් අතට ලැබෙන්නෙ 3000යි. පඩියෙන් 90%ක් ණය වලට කපාගෙන. කොහොමද දෙවියනේ මෙහෙම ජීවත් වෙන්නෙ?

පැත්තකින් හිටිය මට දැනිච්ච දේ,
බහුතරයක් ණයකාරයන් වග සැබෑය. නමුත් ඔවුන් මෙතරම් ණය ලබාගනුයේ ඇයි?
1. උග්‍ර ආර්ථික අර්බුදය හමුවේ ලැබෙන සොච්චම් පඩිය කැළණි පාලම යටින් ගිය පොල් ලෙල්ලක්  මෙන් වීම.
2. ඇතැම් අයගේ විනෝදාංශය "ණය ගැනීම" නිසාය. (මා දන්න එක් චරිතයක් ඇත. ඔහු මසකට වරක් කාගෙන් හෝ ණයක් ගනී.එමෙන්ම පොල්ලක්ද තබයි.)
3. ණයක් වත් නොගෙන තම තමන්ගේ අවශ්‍යතා ඉ‍ටුකර ගැනීම ඉතා අසීරු නිසාය. (නිවසක් තැනීම, මගුල්,අවමගුල්,දාන)
4. මුළු රටම ණයකාරයන්ව ඇතිනිසා අපිත් ණයකාරයන් වීම සුදුසු නිසා.

ලස්සනම දේ ඇතැමුන් ණය ගැනීම ගැන ගල් පැලෙන තර්ක යොදමින් විවේචනය කරන අතරම හවසට බැංකුවේ ණය පෝලිමේ සිටීමය.

* ණය නොගෙන ජීවත් විය හැකිද? ඒ කෙසේද?
මේ ප්‍රශ්නයට පිළිතුරු දීම පාඨක ඔබට බාරයි.
(තහනම් වචනය "ටියුශන්".)

වැදගත් :-
1. "ණයකාරයා"- මෙම වචනය භාවිතා නොකර බැරි නිසා භාවිතා කළෙමි. මාද ඇතුළුව සමස්ථ ගුරු පරපුරට අවනම්බු කිරීමට භාවිතා නොකළෙමි. තරහා අවසර හොදේ.....
2. ගුරුසෙත ණය නවතා ඇත. ( බැංකුවේ තැන්පතු ප්‍රමාණයට වඩා ණය ලබාදී ඇති නිසා ණය නවතා ඇතැයි තතුදත් ආරංචි මාර්ග පවසයි.) දැන් ඉතින් වෙන සෙතක් බලා ගැනීම නුවනට හුරුය.


අවසානයට:-
කෙනෙකුට ණයක් ලබාගෙන එය ගෙවීමේ හැකියාව ඇත්නම් අපට ඇති රුදාව කිම. ණය ගන්නෝ ණය ගත්වා අනෙක් ඈයෝ ඒත් ණය ගත්වා..... හැකි අයුරකින් සියල්ලෝම ගොඩ යත්වා.....

ඉවරයි.........

Images added from here

මට පරණ යාළුවකු මුණගැසුනෙමි.

මට පරණ යාළුවකු මුණගැසුනෙමි.
හලෝ.... මචං කොහොමද ඉතින්.....??????
මාව දැක්ක ගමන් මේ යකා මහ හයියෙන් අහපි. මට දෙලෝ රත්විය. මේ සිද්ධිය වනවිට මා සිටියේ මාගේ නිල රථය (ලංගම බස් රථය) පැමිණෙන තෙක් පාසල ලඟ බස් නැවතුමේය.

පූර්ණ පහසුකම් වලින් යුත් මාගේ නවතම නිළ රථ වලින් එකක්.. 

ටික වෙලාවකින් මගේ බලුප් පත්තුවිය එම එලියෙන් හිතේ කොහේදෝ අස්සක මල බැදෙමින් තිබූ පැරණි මතකයන් හොරෙන් හොරෙන් හිතට නැගුණි.
මේකා අපේ පන්තියෙ හිටියෙ 6,7 වසරවල් දෙකේම. 7 වසරෙ මැදදි එයා වෙන ඉස්කෝලෙකට හිමින් මාරුවිය. ඉන් ඉක්බිතිව මූ මට හමුවූ පළමු වතාව මෙයයි. දෙය්යෝ සාක්කි...... මූට මාව තාම මතකයි.... ඒත් මට මෙයාව අදුරගන්න විනාඩි 2ක්3ක් ගියා. මිනිහ ගොඩක් වෙනස් වෙලා... ‍රැවුල වැවිල... ඇස් මුතුයි.... කලබල පාටයි...
මම පොඩ්ඩක් කථාවට වැ‍ටුන... එතකොටයි දැන ගත්තෙ... මූ බැදල ළමයෙක් ඉන්නවලු... තවත් චන්ද ප්‍රතිපලයක් හෙට අනිද්දලු.
මම අහුව "ඉතින් මචං උබ මොනවද කරන්නෙ?"......" මොනවද මචං මම නොකරන්නෙ...ජීවත් වෙන්න කරන්න පුළුවන් හැමදේම කරනව. උබලට නම් දැන් හොදයි වගේ උබ මොනවද කරන්නෙ?".... මම කරන දේ මම මිනිහට කිව්ව ඊට පස්සෙ බස් එක ආව.

එච්චරයි.........

පසු සටහන - මට අද හමුවූ යාළුවා මගේ වයසේම (25 yrs) අපේ පන්තිවල හිටිය හොදට වැඩ කරන්න පුළුවන් වර්ගයේ (මීටරයක්) චරිතයකි. නමුත් ඔහු 7 වසරේ දී පමණ වෙනත් ලොකු පාසලකට මාරුවිය. මා දන්නේ එපමණකි... ඉන් ඉක්බිති එම ජීවිතය කෙසේ වෙනස් වූවේදැයි මට තවමත් නොතේරේ......

ඔබ මොකද හිතන්නෙ?

සැලකිය යුතුයි - මෙහි භාවිතා කර ඇති "ඌ,මූ,ඒකා,යකා,මචං" වැනි වචන එම පුද්ගලයාට අවමන් කිරීමේ කැත හිතෙන් භාවිතා නොකලෙමි. හුදෙක් යහළුවන් අතර ඇති මෙව්ව එක නිසා භාවිතා කලෙමි.

ටියුෂන් ප්‍රශ්න පත්‍රය

ප්‍රශ්න සියල්ලටම ගැලපෙන හෝ වඩාත් ගැලපෙන පිළිතුරු ‍තෝරා ඔබේ හෘද සාක්ෂියටද හොදින් සවන්දී පිළිතුරු සපයන්න.

ටිටිටියුෂන් කිව්වම කව්ද නොදන්නෙ. මොනවටද ටියුෂන් නොදෙන්නෙ. කොතන්ද ටියුෂන් නැත්තෙ.

ආකර්ෂනීය ටියුෂන් පංති දැන්වීමක්

උපකාරක පංති එහෙම නැත්නම් ටියුෂන් පංති කොතරම් අප සමාජයේ මුල් බැසගෙන ඇත්ද යත්, ඇතැම් පාසල් වල ශිෂ්‍යයන් පාසල් දිනයන් වලත් පාසල් නොගොස් ටියුෂන් පංති සඳහා සහභාගීවන අවස්ථා ඕනෑතරම් දක්නට ලැබෙනව නොවෙද? 

01). මෙසේ වන්නේ ඇයි?

i. පාසල් අධ්‍යාපනයට වඩා ටියුෂන් පන්තිවලින් පරිපූර්ණ අධ්‍යාපනයක් ලැබෙන නිසාද?

ii. පාසල් යාමට වඩා ටියුෂන් පන්තියට යාමෙන් තම දරුවන් ගේ අනාගතය සර්වප්‍රකාරයෙන් සාර්ථක වනවා යැයි දෙමාපියන් සිතන නිසාද?

iii. තම සහෝදර ශිෂ්‍ය ශිෂ්‍යාවන් ටියුෂන් යන නිසා තමාද අනිවාර්යයෙන්  ටියුෂන් යායුතු යැයි ශිෂ්‍ය ශිෂ්‍යාවන් සිතන නිසාද?

iv. පාසලේ වැඩ කරන අතරේ ටියුෂන් එකක් ද කලයුතු යැයි ගුරුවරුන් සිතන නිසාද?

02). ටියුෂන් යනු සමාජයට පිලිලයක්ද?

i. ඔව්, අනිවාර්යයෙන්ම

ii. අපෝ! කිසිසේත්ම නැත.

iii. සමහර විට වෙන්න පුළුවන්

iv. හරියට කරනව නම් වරදක්ද නැත.

03). පාසල් ගුරුවරයෙක් වුනාම ටියුෂන් කරන්නම ඕනද?

i. ඔව්, අනිවාර්යයෙන්ම

ii. අපෝ! ඒක එච්චර හරි නෑ

iii. කාලය හා හැකියාව ඇත්නම් කලාට කමක් නැත.

iv. සිසුන්ගේ අවශ්‍යතාව මත ඔවුන්ගේ ආරාධනයෙන් එකක් දෙකක් කලාට කම් නැත.

04). ටියුෂන් පංති සහමුලින්ම නවතා දැමිය යුතුයැයි ඔබ සිතන්නේ නම් ඒ සඳහා ගත හැකි ක්‍රියාමාර්ගය වනුයේ,

i. ටියුෂන් පංති පැවැත්වීම තහනම් කිරීම

ii. පාසල් සවස 3 දක්වා පැවැත්වීම

iii. දරුවන් තුල පාසල හා පාසල් අධ්‍යාපනය කෙරෙහි ධනාත්මක ආකල්ප ඇති කිරීම

iv. පාසල් අධ්‍යාපනය තවදුරටත් නවීකරණය කර දරුවන්ට හා ගුරුවරුන්ට ප්‍රියජනක ඉගෙනුම් ඉගැන්වීම් අවස්ථා වර්ධනය

05). අවසන් වශයෙන් කීමට ඇත්තේ?

___________________________________________________________________

___________________________________________________________________

___________________________________________________________________

ඔබේ පිළිතුරු හැරෙන තැපෑලෙන් comment කරන්න. ටියුෂන් පන්තියක වටිනා පරණ කාඩ්පතක් දිනාගන්න.

ප.ලි. මම පාසලට ගිය මුල්ම දවස්වල ගොඩක් අය මගෙන් ඇහුව සර් ටියුෂන් කරන්නෙ නැද්ද කියල. ඉතින් මමත් කිව්ව ඔව් කරනව කියල (ලැජ්ජාව වහ ගන්න). මේ පඩියෙන් වැඩක් කරගන්න බොහොම අමාරුයි , ඒත් මොන හේතුවටද මන්ද මට ටියුෂන් කරන්න හිතෙන්නෙ නෑ...... ගුරුවරයෙක් උනාම ටියුෂන් අනිවාර්යයෙන්ම කරන්න ඕන කියල නීතියක් නෑනෙ...... 

අනාගතයේ මුණගැසෙමු......................

උදේට කමු..............

ඉස්කෝලෙ පටන් අරන් සති 2ක් ගෙවිල ගියපු ඉක්මන.
අපේ කොල්ලො කෙල්ලො අවුරුදු කාල අපටත් අරන් ඇවිත්. පටන් ගත්ත දවසෙ දකින් දකින තැන වන්දනා මාන. මේක ලියන්න පටන් ගත්තෙ ඒව කියන්න නෙවෙයි. උදේ ‍රැස්වීමෙ වෙච්ච දෙයක් කියන්න.

එක දවසක උදේ ‍රැස්වීමෙ හිටපු ළමයෙක් එක පාරටම දඩාස් ගාල බිමට පතිත උනා. අපේ සර්ල ළමය උස්සන් විවේකාගාරයට ගෙනාව. මාත් පස්සෙන් පහලට ආව මොකද උනේ බලන්න. ළමය 10 වසරෙ වැඩටත් දක්ෂයෙක්. ඒ ළමයට සාත්තු කලාම සිහිය ආව. අපි ඇහුව මොකද උනේ කියල.  "එක පාරටම නිල්පාට උනා එච්චරයි මතක " එහෙම කිව්ව. අපි තවත් විස්තර ඇහුව. වැඩිය විස්තරයක් කියන්නෙ නෑ. හැබයි මෙයා මේ කලන්තෙදාල වැ‍ටුනමලු මීට කලින් මෙහෙම දෙයක් වුනේ නෑ කියල කිව්ව. අපි එයාගෙ තාත්තට කථාකලා ඇවිත් පුතාව එක්ක යන්න කියල.
පැයකට විතර පස්සෙ තාත්ත ආව. අපි විස්තරේ කිව්ව ඊට පස්සෙ ඒ ළමයගෙ තාත්ත මාර කථාවක් කිව්ව....
"අනේ සර් අපෙ කොල්ල කවදාවත් උදේට කන්නෙ නෑ, තේ එක බොනගමන් විස්කෝත්තක් කනව එච්චරයි. හැබැයි බත් එක අරන් එනව ඉන්ටර්වල් එකට කන්න." අපි ඇහුව ඔයාල උදේට කන්න බලකරන්නෙ නැද්ද කියල, "මොන බලකිරිලිද සර් කිව්වට අහන්නෙ නෑ"
කියල ඒ තාත්ත කිව්ව.


මේ වගේ සිදුවීම් බොහෝ පාසල් වලට පොදු දෙයක් .
වර්ථමානයේ බොහෝ සිසුන් උදේ ආහාරය මගහැර තමයි පාසලට එන්නෙ. ඒකෙන් වෙන්නෙ රෝගී සිසු පරපුරක් පාසල් පද්ධතියෙන් බිහිවීම පමණයි.


මෙතනදි සෘජුවම සම්පූර්ණ වගකීම පැවරෙන්නෙ දෙමාපියන් අතේ. ඔවුන් දැනගන්න ඕන තමන්ගෙ දුවට පුතාට උදේ ආහාරය ලබා දෙන්න. නමුත් දෙමවුපියන් කාර්යබහුල වීම නිසා ඔවුන් දරුවන්ගේ ජීවිත අනතුරට ලක් කරනවග පැහැදිලියි. අම්මේ තාත්තේ පුතාට දුවට උදේට හොද ආහාර වේලක් ලබා දෙන්න (හොදින් හෝ නරකින්).

උදේට ඉදි ආප්ප ගෑරුප්පුවෙන් කන ළමයින්